Mat 13 | KYG | STEP | Ani afina'mo nopati'mo ataleno uno lamino ani kotu agi'nale'mo itopale'mo mai'nige'apae'mo

Matthew 13

Avina yafe'mo aeno kalafefa gemo hu'niya gemae

(Mak 4:1-9; Luk 8:4-8)

1 Ani afina'mo nopati'mo ataleno uno lamino ani kotu agi'nale'mo itopale'mo mai'nige'apae'mo 2 asole vaya'mo e'a ali'a anupa hu'a mai'nageno'ae'mo he tino sipifi'mo haino fai mai'nige'apae'mo ani agi'nale'mo he ti'a mai'nae. 3 Agaemo aeno kalafefa gefati'mo mago'e gemo huno hapa paino'ae'mo, avina ya'mo nehakaleya vekamo'a avina ya'mo hakalesiyafe'mo u'niye. 4 Avina ya'mo yaga auno hakaleme hakaleme ne'vigeno'ae'mo mago avina ya'mo kate'mo asagauno ai'nigeno'ae'mo nama anaga'mogi e'a ne'nae. 5 Mago avina ya'mo yafa agotofule'mo aise mopamo hane'niya yate'mo asagauno aiteno aise mopamo hane'niya'mofe'mo malage huno hage'niye. 6 Hage'niya'monanafa yegemo'mo haineno ne'agegeno'ae'mo hafu'yamo o'ae'niya'mofe'mo leno faluteteno leno asaga li'niye. 7 Mago avina ya'mo aufe nofi'mo hane'niya yapi'mo asagauno aiteno hage'niyana aufe nofi'mo'a ago kino ati kae'niye. 8 Mago avina ya'mo alagepa mopafi'mo asagauno aiteno hageno haiteno magoke yosafati'mo vani hataleti'amo aege sikisiti'amo aege teti'amo aege huno ae'niye. 9 Gemo afisaya lapakesamo hane'nisiyana mani gemo afiyo, huno hapa pai'niye.

10 Ge'amo ne'afiya vaya'mogi agaetegamo e'a, na kava higekae'mo aeka kalafefa gemo huka hapa nepaine, hu'a ge hu'a afi ge'nageno'ae'mo, 11 Goti'a yagaino ne'apateya kavafe'mo ava gemo aepa'amo alino fala ki male'niya aepa'amo ago alino lapami'niya'monanafa apakaemo alino o'apami'niye. 12 Ali'nisaya vaya'mo mago'e huno alino apamisige'a alisageno'ae'mo mago'e ya'apimo hanegaiya'monanafa o'ali'nisaya vaya'ai apayapati'mo aise'amo ali'nisaya ya'mo hapa falegaiye. 13 Apakaemo aulu he'a ne'agaya'monanafa no'agae. Apaketafo hu'a ne'afiya'monanafa afi'a aeto nosaya'mofe'mo ae'na kalafefa gemo hu'na hapa nepauve. 14 Aiyeya'a Gotitegati gemo alinineno aeno hakalo huno hapa pai'niya gemo apakaetegamo afole ai'niye. Aiyeya'a huno'ae'mo,

Afige afige hutapa maigaya'monanafa afitapa aeto osugae. Agege agege hutapa maigaya'monanafa agetapa aeto osugae. 15 Ani gelefe'mo apaipamo lokiya vaige apakesa aino akanige apaulagamo ali huge hu'nige'a mai'nae. Ani kava hu'a o'mai'naesinana apaulagafati'mo agete'a apakesafati'mo afite'apae'mo apaipafi'mo agete'a nagaetegamo ai'a afe le'a esage'na ali'na alagepa hu'na apate'novesine,
huno avo'mo kae male'niye.

16 Afi'a aeto osu'naya'monanafa lapaulagafati'mo agege lapakesafati'mo afige hutapa mai'naya'mofe'mo Goti aulagale'mo alagepa hutapa ne'maiyanagetapa afa'a lapamogaga aigae. 17 Lama ge lapa nepauve, asole vaya'mogi Gotitegati gemo alini e'a ae'a hakalo hu'a hapa nepaiya vaya'e fatago vaya'mogi'e'mo lapakaemo ne'agaya kava'mo agesayafe'mo hapau'niya'monanafa o'age'nae. Lapakaemo ne'afiya gemo afisayafe'mo hapau'niya'monanafa o'afi'nae.

18 Ani kavatefe'mo avina yafe'mo ae'na kalafefa gemo aepa'amo afiyo. 19 Mago vaya'mogi Goti'a yagaino ne'apateya kavafe'mo ava gemo afite'apae'mo alagepa hu'a no'afisayana hosu ne'mo'a eno apaipafi'mo hakale male'niya avina ya'mo hapa faleno alinino ne'viye. Ani kava huno kate'mo asagauno ai'niya avina yakana huno hane'niye. 20 Mago vaya'mogi Goti ge'amo afite'apae'mo malage hu'a alite'a apamogaga ne'aiya kava huno yafa agotofule'mo asagauno ai'niya avina yakana hu'a mai'nae. 21 Hapafu'yamo o'ae'niya'mofe'mo aise afina'mo ne'maiye. Goti ge'amo afi'naya'mofe'mo hanageke ya'mo alige apaini hu'a apatege nehaya kava'mo afole ne'aige'apae'mo ago atale'a asagau'a ne'aiye. 22 Mago vaya'mogi Goti ge'amo afite'apae'mo ma mopafi'mo maisaya kavafeke'mo hapausoli hute'a kagemi ya'mo'a humi ne'apateya ya'mo alisayafeke'mo hapa'ye nehigeno'ae'mo Goti ge'amo ago aeno ati nekaeya kava huno aufe nofi'mo hane'niya yapi'mo asagauno ai'niya avina yakana hu'a mai'nae. 23 Mago vaya'mogi Goti ge'amo afite'apae'mo gemo aepa'amo alagepa hu'a afi'naya vaya'mo alagepa mopafi'mo asagauno ai'niya avina yakana hu'a mai'nae. Apaipafati'mo alagamo ae'niye. Mago vaya'amogi vani hataleti'a alagamo aege mago vaya'amogi sigisiti'a alagamo aege mago vaya'amogi teti'a alagamo aege hu'a ae'nae, huno hapa pai'niye.

Hoyafi inofe'mo aeno kalafefa gemo hu'niya gemae

24 Mago'e huno aeno kalafefa gemo huno hapa paino'ae'mo, Goti'a yagaino ne'apateya kava'mo mago hoyagana huno hane'niye. Mago vekamo'a hoya'afi'mo alagepa avina ya'mo hakale male'niye. 25 Muki vaya'amo ago apau kale'nageno'ae'mo kame'amo'mo eno vitigana ino'mo viti hoyafi'mo hakale maleno u'niye. 26 Viti ne'ya'mo ago hageteno alagamo ae'nige'apae'mo agayana aigofe viti ino'mo mago hage'nige'a age'nae. 27 Agete'apae'mo ali'ya'amo ne'aliya vaya'mogimo u'a hoya aepa vekae'mo, ala nene, hu'a, alagepa avina ya'mo hakale male'nana yapati'mo haiya kava huno ani aigofe viti ino'mo afole ai'niye, hu'a ge hu'a afi ge'nageno'ae'mo, 28 Kame'nimo'mo ani kava'mo hu'niye, huno hapa pai'nige'apae'mo, uta ani ino'mo vakaita atalesupiye, hu'a afi ge'nageno'ae'mo, 29 ha'ao, huno, ino'mo alitapa vakaisayategamo viti'e'mo alitapa vakaigayanagi afa ateyo 30 viti'e ino'e'mo magokepi lokaeno haneme haneme ne'visige'apae'mo ne'ya'mo alisaya afina'mo aligae. Ne'ya'mo lesige'nae'mo ne'ya'mo alisaya vaya'aife'mo, hogotetapa ino'mo vakaitapa atafi'mo kaesayafe'mo hayaetapa male'netapa viti ne'ya'age'mo alitapa ne'ya'mo ne'malova nopi'mo maleyo, hu'na hapa paiguve, huno hapa pai'niye.

Mago avina ya'mo agi'amo masateti'e falaovafi'mo ne'ataya ya'mo agi'amo yisi'efe'mo aeno kalafefa gemo hu'niya gemae

(Mak 4:30-32; Luk 13:18-19)

31 Yesu'a mago'e huno aeno kalafefa gemo hapa paino'ae'mo, Goti'a yagaino ne'apateya kava'mo hane'niya kava huno mago vekamo'a masateti avina ya'mo hoya'afi'mo hakale male'niya avina yakana huno hane'niye. 32 Masateti avina ya'mo mago aise avina ya'mo hane'nigeno muki avina ya'amo'a ago aeno aga se'niya'monanafa hageno alopa heteno'ae'mo muki alu ne'ya'amo ago aeno ne'agase. Hageno uno haige haige huno kosino yosagana huno hai'nigeno'apae'mo nama anaga'mogi haleli'e'a akopale'mo hakale'a ne'maiye, 33 huno huteno Yesu'a mago'e huno aeno kalafefa gemo huno hapa paino'ae'mo, Goti'a yagaino ne'apateya kava'mo hane'niya kava huno mago a'mo'a falaovafi'mo ne'ataya ya'mo agi'amo yisimo alino alopa falaovafi'mo ate male'nigeno'ae'mo aino atagu faeno uneno huno muki falaovafi'mo ali'ya'mo ali'niye, huno hapa pai'niye.

34 Yesu'a mani muki ge'amo aeno kalafefa gefatike'mo huno hapa pai'niyana huno afole aino hapa opai'niye. 35 Ani ge huno hapa nepaigeno'ae'mo Gotitegati gemo alinineno aeno hakalo huno hapa nepaiya vekamo'a hu'niya ge'amo afole ai'niye. Ina gemo'a huno'ae'mo,

Ae'na kalafefa gefatike'mo hu'na hapa paiguve. Ma mopamo alo hu'niya afinateti'mo alino fala kino maleme maleme e'niya gemo ae'na hakalo hu'na hapa paiguve,
huno avo'mo kae male'niye.

Inofe'mo aeno kalafefa gemo hu'niya gemo aepa'ae'mo hu'niya gemae

36 Yesu'a muki vaya'aife'mo, inagi ago utaleyo, huno hapa paiteno alino apate'nige'a utageno'ae'mo nopi'mo haino mai'niye. Mai'nige'apae'mo ge'amo ne'afiya vaya'mo agaetegamo e'a, inofe'mo aeka kalafefa gemo huka hapa pai'nana gemo aepa'amo laha paiyo, hu'a ge hu'a afi ge'nae.

37 Yesu'a, hoya'afi'mo alagepa avina ya'mo hakale'niya vekamo mai'niya kava huno Vemo mafa'nemo mai'niye. 38 Hoyamo hane'niya kava huno muki ma mopamo hane'niye. Alagepa avina ya'mo hane'niya kava hu'a Goti'a yagaino ne'apateya vaya'mo mai'nae. Hosu ino'mo hane'niya kava hu'a hosu ne'mo vaya'amo mai'nae. 39 Kame veka'amo mai'niya kava huno Nevo'a mai'niye. Ne'ya'mo alisaya afina'mo hane'niya kava huno ma mopamo hano hisiya afina'mo hane'niye. Ne'ya'mo alisaya vaya'mo mai'naya kava hu'a enisole vaya'mo mai'nae. 40 Ino'mo vakai'a atafi'mo kae'naya kava huno hano hisiya afina'mo 41 Vemo mafa'nemo'a enisole vaya'amo alino apatesige'a u'a yagaino ne'apateya kegi'yafati'mo ali'a hapafai'a apatalegae. Hosu kava'mo hisayafe'mo ali'a he ti'a ne'apataya vayanagi muki hosu vayanagi hu'a apavaleli'u'a 42 alopa atafi'mo yaga au'a apatalesage'a avi'ya huge apavepi'mo hani'a agafu kige hu'a maigae. 43 Ani afina'mo afole aisige'apae'mo fatago vaya'mo Afo'apimo'mo yagaino ne'apateya kote'mo yegegana hu'a ae'a ha le'a maigae. Lapakesa hane'nisiyana mani gemo afiyo, huno hapa pai'niye.

Mago'e huno aeno kalafefa gemo hapa pai'niya gemae

44 Goti'a vaya'aite'mo yagaino ne'apateya kava'mo hane'niya kava huno mago vekamo'a alopa moni'amo kesifi'mo maleteno hoya'afi'mo keli kafiteno kesi'amo alino ani kelifi'mo maleteno aeno ati kae maleteno ataleno u'niye. U'nigeno henaga'amo mago vekamo uno ani hoyafi'mo ai'yu ai'niyategamo ani kesimo ageno avateteno halate aeno ati kae maleteno uno muki kagemi ya'amo alino maketi hu'nige'a miya fai'nageno monimo aliteno ani mopamo miya fai'niye. Alisiyafe'mo lusi kava huno amogaga ai'niya'mofe'mo muki kagemi ya'amo ago alino atale'niye.

45 Halate Goti'a vaya'aite'mo yagaino ne'apateya kavafe'mo lapa pai'nae'mo, mago'e monimo alisiyafe'mo alininuno maketi nehiya vekamo'a alagepa sesumo miya faisiyafe'mo kahauya hume hume u'niye. 46 Agaemo hogote sesumo lusi monileti'mo miya nefaiya sesumo age maleteno uno muki kagemi ya'amo alino maketi hu'nige'a miya fai'nageno moni aliteno uno ani sesumo miya fai'niye.

47 Halate Goti'a vaya'aite'mo yagaino ne'apateya kavafe'mo lapa pai'nae'mo, vaya'mogimo umenimo solovala anipi'mo yaga au male'nage'apae'mo muki alu noyame alu noyamemo hai'a ne'maiye. 48 Umenifi'mo hai'a havai te'nage'apae'mo halauli e'a ani kahaepale'mo malete'a itopale'mo mai'ne'apae'mo ali'a fako hu'a alagepa noyame'amo paketifi'mo malete'a hosu noyame'amo ali'a yaga au'a ne'atalae. 49 Ani kava hu'a ma mopamo hano hisiya afina'mo enisole vaya'mo emi'e'a hosu vaya'mo fatago vayapati'mo apavaleli'u'a 50 alopa atafi'mo yaga au'a apatalesage'a avi'ya huge apavepi'mo hani'a agafu kige hu'a maigae, huno hapa pai'niye.

51 Yesu'a huno'ae'mo, muki mani gemo aepa'amo afi'nafiye, huno apafi ge'nige'apae'mo, he, hu'a hu'nae. 52 Agaemo hapa paino'ae'mo, Afamo anaga'ai aepa vekamo'a no'apifi'mo alagepa ya'mo saufamo ageno male'niya ya'e akeya'vilaga ageno male'niya yapati'e'mo alino afamo anaga'amo ne'apamiya kava hu'a muki ke'aepa gemo tisa vaya'mogimo Goti'a yagaino ne'apateya kavafe'mo ali'a apaya malage'a afi'naya tisa vaya'apimogi saufa ge'e atafa ge'e'mo ali'a ne'apamiye, huno hapa pai'niye.

Nasalasa taonifi'mo mai'naya vaya'mogimo Yesu'mo apakame'ya ami'naya gemae

(Mak 6:1-6; Luk 4:16-30)

53 Yesu'a mani aeno kalafefa gemo hapa paiteno ani haopalegati'mo ataleno u'niye. 54 Agai'a taonifi'mo uno apakae mono nopi'mo haino alino apaya male'nige'a afi'a hapau aite'apae'mo, ani vekamo'a afiteno age'niya kava'e no'agona aune kava'mo nehiya himamu'a'e'mo haiyateti'mo ali'niye. 55 Ala agi vekamo mafa'ne'amo o'mai'niya'monanafa no nekiya vekamo velafa'mo mafa'ne'amo mai'niye. Ita'amo'mo Maliya'a mai'niye. Yemisi'agi Yosefe'agi Saimoni'agi Yutasi'mogi hu'a agana'amogimo mai'nae. 56 Muki asa'amogimo maige hu'a mai'ne'a lagae'e'mo magokepi mai'nagi muki ya'amo haiyateti'mo ali'niye, hu'a hute'a 57 hosu apaugosa kalite'a apakame'ya ami'nae.

Yesu'a hapa paino'ae'mo, Gotitegati gemo alinineno aeno hakalo huno hapa nepaiya vekamo ala agi'amo ali'nisiyana taoni'afi'mo mai'naya vaya'mogi'e afamo anaga'amogi'e'mo ala agi'amo o'amigae, huno hapa pai'niye. 58 Taoni'afi'mo mai'naya vaya'mogi agaefe'mo apakesa afi'a fatago osu'naya'mofe'mo taoni'afi'mo asole no'agaya aune kava'mo osu'niye.